لوين رايحين

حبايب قلبي
يتحدثون عن الحب
سؤال؟
لسه بقيان حب بقلوب البشر؟
كلامي واضح وموجه للجميع
الحب بالنسبة إلي شمعة بيضاء
أو شموع بلون قوس قزح
ولحظة تأمل من شباك بيتي والقمر عم ينور دربنا المعتم الطويل
طبعاً لأنو الكهرباء عم تنقطع ببعض الأماكن
ومنورة طول الليل بأماكن تانية
خيار وفقوس
المهم نسمة صافية ودعاء من القلب للحب لحتى يرجع يرفرف بقلوبنا
يمكن قسوة المرحلة اللي مرينا فيها و لسى عم نعاني
وحكمة ولاد بلدنا وصبرهم
وهن عم يتحملوا ويصبروا
ومنهم عم يشارك بالدفاع عن الوطن
ومنهم عم يشتغل لحتى الحياة تضل مستمرة
بتعرفوا ليش ؟
لأن الحب لسى ساكن قلوبهم
الحياة من غيروا متل قشرة البصلة
ما بنوبك منها إلا ريحتها
بس الياسمين والفل المزروع بأرض بلدي الطاهرة الشريفة الكريمة
عم يفوح
ويغطي كل الروايح اللي سببتها ريحة العدوان والضرب والدخان الأسود
بلدنا مزروعة بالإيمان وحب الناس لبعض وكرمهم
فاجئني جاري لما دق الباب علي
وفتحت وقدملي صحن فيه حلويات منزلية
وقدملي ياه بكل حب
جار اشتهيتلك هدول
وبعد مدة رديتلوا السكبة
هيك كانوا يسموها
سكبة
الحياة حلوة لما بترجع لجذورها
أنا ماعم قول نرجع للخلف
لاء
نرجع لبعض العادات الجميلة اللي كانت تجمعنا بالمحبة
والجار لما يقول آه
تلاقي عندو الجار لأربعين دار
والكل عم يقدم خدماته اللي بيقدر عليها
هذا يعني شيء جميل من الحب
وبالحب منعرف لوين رايحين

شاهد أيضاً

لوين رايحين

الحياة حلوة والأحلى هو الحب وبزاويتي هي حابب أحكي عن الحب والكره نعم الحب والكره …